Դեկտեմբերի 12- ին առաջին անգամ հայտարարվեց հայ խոստումնալից երգչուհի Սոսե Գրիգորյանի «Ով Սիրուն Սիրուն» երգի տեսահոլովակի շնորհանդեսի մասին, որի նկարահանումներն անցկացվել էին Երուսաղտմում: Այն կյանքի էր կոչվել Երուսաղեմի ամենա լավագույն հրեա երաժիշտների հետ համագործակցությամբ:
Մեր ծանոթությունը Սոսե Գրիգորյանի հետ շատ պատահական էր ստացվել տարիներ առաջ ու իրոք ուրախալի էր, որ Երուսաղեմի հայկական համայնքում Սոսեն, իր բոլոր կատարումներով այդ թվում նաև Կոմիտասյան, փորձում է նոր կյանք ու շունչ հաղորդել մշակութային «գրեթե» մեռած ու պասիվ կյանքին: Այս տարի աշնանը Երուսաղեմում ազդարարվեց «Արմատներ» մշակույթային նոր հանձնախմբի ստեղծման մասին, որն իր անդրանիկ ձեռնարկով հանդես եկավ սեպտեմբերի 21- ին Հայաստանի անկախությանը նվիրված միջոցառմամբ: Այն հովանավորվում է անձամբ Երուսաղեմի Հայոց պատրիարքի կողմից:
2020 թվականը հուսանք մշակույթային նոր ձեռնարկների շնորհիվ նոր լիցք կհաղորդի համայնքային կյանքին, որի անշուշտ ամենակարկառուն դեմքերից մեկը Սոսե Գրիգորյանն է : Նա 2017 թվականին Երուսաղեմի «Ռուբին» երաժշտության և պարի ակադեմիան ավարտելուց հետո աշխատում էր Երուսաղեմի Հելլեն Կելլերի անվան սահմանափակ ունակություններով երեխաների դպրոցում, կույր երեխաների դասարանում երաժշտություն էր դասավանդում: Այժմ նույն կրթահամալիրում նա շարունակում է ուսումն՝ «Հրեական, Արաբական, Ժամանակակից և Ջազ երաժշտության ոլորտներում մասնագիտական որակավորումը բարձրացնելու նպատակով:
Մայր Հայրենիքի հետ կապը սկսվել էր 2006 թվականից և տարբեր մրցույթների և փառատոնների մասնակցելու արդյունքում արժանացել է բազմաթիվ պատվոգրերի և վկայականների:
Խոսելով Երուսաղեմում ունեցած իր ելույթների մասին, հայտնեց, որ ապրիլին եղեռնի զոհերի հիշատակի ոգեկոչման օրը Բեթղեհեմում հանդես էր եկել մենահամերգով, ծրագրում՝ Կոմիտաս և հայկական ժողովրդական երգեր: «Ցանկությունս էր օտարներին, մասնավորապես արաբներին, ներկայացնել հայկական երգարվեստի գոհարները: Համերգից հետո նրանք մոտենում էին ինձ, շնորհավորում ու ասում էին, որ ոչ մի բառ չեն հասկացել, բայց ամեն ինչ այնուհետև հասկացանք», – պատմում էր երգչուհին, հավելելով, որ օտարները երգերի մեկնաբանությանը հետևում էին անթարթ աչքերով: Սոսեն 2017 – ին մենահամերգով հանդես եկավ Բեթղեհեմ քաղաքում, իսկ 2018- ին մենահամերգով Երուսաղեմի ժառանգավորած վարժարանում:
2018 թվականի մարտին իր առաջին երգի՝ «Բինգյոլ» – ի տեսահոլովակի շնորհանդեսը տեղի ունեցավ Հայաստանում: Մեկ տարի անց՝ 2019թ.-ի մարտին թողարկվեց երգչուհու առաջին «Գույներ» ձայնասկվառակը:
Այս տարի հուլիս Կիպրոսի Նիքոսիա քաղաքում «Հայ Դատի» ակումբում հանդես եկավ դասախոսությամբ ՝ ներկայացնելով Սայաթ Նովայի և Կոմիտաս երաժշտությունը: Նմանատիպ ծրագրով օգոստոսին հանդես եկավ նաև Վիեննայի Հ.Մ.Ը.Մ ակումբում:
Մեր խմբագրությունը ստեղծագործական հաջողություններ է մաղթում Սոսեին ու հպարտանաում մեր հայրենակցի ազգանվեր աշխատանքով:
