Սեպտեմբերի 1 – ին Պետախ Տիկվա քաղաքի Բեյտ Օլեյում իր նոր ուսումնական տարին բացեց նաև հայկական դպրոցը:
ՈՒսուցչուհի Անի Հարությունյանը շնորհավորեց երեխաներին նոր ուսումնական տարվա կապակցությամբ ու հաջողություններ մաղթեց հայ աշակերտներին:
Հայկական դպրոցը հիմնադրվել է Պետախ Տիկվայում 2004թ.-ին ու արևելահայերենով դասավանդվող միակ կառույցն է Իսրայելում: Մինչև 25 աշակերտ ունեցող դասարաններում դասավանդվում էր ոչ միայն Հայոց Լեզու, այլև երկրի կենտրոնի հոգևոր հովիվ հայր Տիրան աբեղա Հակոբյանի շնորհիվ նաև հայկական երգ և երաժշտություն, ինչպես նաև գործում էր հայկական պարի խմբակը: Այս տարիների ընթացքում սերընդափոխություն տեղի ունեցավ ու աշակերտների թվի պակասի պատճառով որոշակիորեն տուժեց նաև դպրոցը:
Հայաստանի կառավարության, ՀՀ կրթության ու գիտության նախարարության, նախկին Սփյուռքի նախարարության ու ներկայիս Սփյուռքի գործերով գլխավոր հանձնակատարի գրասենյակի շնորհիվ դպրոցը միշտ ապահովված է ուսմնական մեթոդաբանական ձեռնարկներով ու նոր գրականությամբ:
Ավելի քան 9 տարի Պետախ Տիկվայում միասին աշխատող «Նաիրի» և «Նոյան Տապան» միությունների համատեղ ջանքերով ավելի արդյունավետ է դարձել դպրոցի աշխատանք:
Թերթի խմբագրությունը հաջողություններ է մաղթում դպրոցին ու կոչ անում երկրի կենտրոնում բնակվող հայ ընտանիքներին շաբաթական գոնե մեկ անգամ դպրոց բերել իրենց երեխաներին:
